Mandalas 8 - (1716 verses)
Mandala 8 · Verse 7
vayam enam idā hyo 'pīpemeha vajriṇam | tasmā u adya samanā sutam bharā nūnam bhūṣata śrute
Mandala 8 · Verse 8
vṛkaś cid asya vāraṇa urāmathir ā vayuneṣu bhūṣati | semaṁ naḥ stomaṁ jujuṣāṇa ā gahīndra pra citrayā dhiyā
Mandala 8 · Verse 9
kad ū nv a1syākṛtam indrasyāsti pauṁsyam | keno nu kaṁ śromatena na śuśruve januṣaḥ pari vṛtrahā
Mandala 8 · Verse 10
kad ū mahīr adhṛṣṭā asya taviṣīḥ kad u vṛtraghno astṛtam | indro viśvān bekanāṭām̐ ahardṛśa uta kratvā paṇīm̐r abhi
Mandala 8 · Verse 11
vayaṁ ghā te apūrvyendra brahmāṇi vṛtrahan | purūtamāsaḥ puruhūta vajrivo bhṛtiṁ na pra bharāmasi
Mandala 8 · Verse 12
pūrvīś cid dhi tve tuvikūrminn āśaso havanta indrotayaḥ | tiraś cid aryaḥ savanā vaso gahi śaviṣṭha śrudhi me havam
Mandala 8 · Verse 13
vayaṁ ghā te tve id v indra viprā api ṣmasi | nahi tvad anyaḥ puruhūta kaś cana maghavann asti marḍitā
Mandala 8 · Verse 14
tvaṁ no asyā amater uta kṣudho3 'bhiśaster ava spṛdhi | tvaṁ na ūtī tava citrayā dhiyā śikṣā śaciṣṭha gātuvit
Mandala 8 · Verse 15
soma id vaḥ suto astu kalayo mā bibhītana | aped eṣa dhvasmāyati svayaṁ ghaiṣo apāyati
Mandala 8 · Verse 1
tyān nu kṣatriyām̐ ava ādityān yāciṣāmahe | sumṛḻīkām̐ abhiṣṭaye
Mandala 8 · Verse 2
mitro no aty aṁhatiṁ varuṇaḥ parṣad aryamā | ādityāso yathā viduḥ
Mandala 8 · Verse 3
teṣāṁ hi citram ukthya1ṁ varūtham asti dāśuṣe | ādityānām araṁkṛte
Mandala 8 · Verse 4
mahi vo mahatām avo varuṇa mitrāryaman | avāṁsy ā vṛṇīmahe
Mandala 8 · Verse 5
jīvān no abhi dhetanādityāsaḥ purā hathāt | kad dha stha havanaśrutaḥ
Mandala 8 · Verse 6
yad vaḥ śrāntāya sunvate varūtham asti yac chardiḥ | tenā no adhi vocata
Mandala 8 · Verse 7
asti devā aṁhor urv asti ratnam anāgasaḥ | ādityā adbhutainasaḥ
Mandala 8 · Verse 8
mā naḥ setuḥ siṣed ayam mahe vṛṇaktu nas pari | indra id dhi śruto vaśī
Mandala 8 · Verse 9
mā no mṛcā ripūṇāṁ vṛjinānām aviṣyavaḥ | devā abhi pra mṛkṣata
Mandala 8 · Verse 10
uta tvām adite mahy ahaṁ devy upa bruve | sumṛḻīkām abhiṣṭaye
Mandala 8 · Verse 11
parṣi dīne gabhīra ām̐ ugraputre jighāṁsataḥ | mākis tokasya no riṣat
Mandala 8 · Verse 12
aneho na uruvraja urūci vi prasartave | kṛdhi tokāya jīvase
Mandala 8 · Verse 13
ye mūrdhānaḥ kṣitīnām adabdhāsaḥ svayaśasaḥ | vratā rakṣante adruhaḥ
Mandala 8 · Verse 14
te na āsno vṛkāṇām ādityāso mumocata | stenam baddham ivādite
Mandala 8 · Verse 15
apo ṣu ṇa iyaṁ śarur ādityā apa durmatiḥ | asmad etv ajaghnuṣī
Mandala 8 · Verse 16
śaśvad dhi vaḥ sudānava ādityā ūtibhir vayam | purā nūnam bubhujmahe
Mandala 8 · Verse 17
śaśvantaṁ hi pracetasaḥ pratiyantaṁ cid enasaḥ | devāḥ kṛṇutha jīvase
Mandala 8 · Verse 18
tat su no navyaṁ sanyasa ādityā yan mumocati | bandhād baddham ivādite
Mandala 8 · Verse 19
nāsmākam asti tat tara ādityāso atiṣkade | yūyam asmabhyam mṛḻata
Mandala 8 · Verse 20
mā no hetir vivasvata ādityāḥ kṛtrimā śaruḥ | purā nu jaraso vadhīt
Mandala 8 · Verse 21
vi ṣu dveṣo vy aṁhatim ādityāso vi saṁhitam | viṣvag vi vṛhatā rapaḥ
Mandala 8 · Verse 1
ā tvā rathaṁ yathotaye sumnāya vartayāmasi | tuvikūrmim ṛtīṣaham indra śaviṣṭha satpate
Mandala 8 · Verse 2
tuviśuṣma tuvikrato śacīvo viśvayā mate | ā paprātha mahitvanā
Mandala 8 · Verse 3
yasya te mahinā mahaḥ pari jmāyantam īyatuḥ | hastā vajraṁ hiraṇyayam
Mandala 8 · Verse 4
viśvānarasya vas patim anānatasya śavasaḥ | evaiś ca carṣaṇīnām ūtī huve rathānām
Mandala 8 · Verse 5
abhiṣṭaye sadāvṛdhaṁ svarmīḻheṣu yaṁ naraḥ | nānā havanta ūtaye
Mandala 8 · Verse 6
paromātram ṛcīṣamam indram ugraṁ surādhasam | īśānaṁ cid vasūnām
Mandala 8 · Verse 7
taṁ-tam id rādhase maha indraṁ codāmi pītaye | yaḥ pūrvyām anuṣṭutim īśe kṛṣṭīnāṁ nṛtuḥ
Mandala 8 · Verse 8
na yasya te śavasāna sakhyam ānaṁśa martyaḥ | nakiḥ śavāṁsi te naśat
Mandala 8 · Verse 9
tvotāsas tvā yujāpsu sūrye mahad dhanam | jayema pṛtsu vajrivaḥ
Mandala 8 · Verse 10
taṁ tvā yajñebhir īmahe taṁ gīrbhir girvaṇastama | indra yathā cid āvitha vājeṣu purumāyyam
Mandala 8 · Verse 11
yasya te svādu sakhyaṁ svādvī praṇītir adrivaḥ | yajño vitantasāyyaḥ
Mandala 8 · Verse 12
uru ṇas tanve3 tana uru kṣayāya nas kṛdhi | uru ṇo yandhi jīvase
Mandala 8 · Verse 13
uruṁ nṛbhya uruṁ gava uruṁ rathāya panthām | devavītim manāmahe
Mandala 8 · Verse 14
upa mā ṣaḍ dvā-dvā naraḥ somasya harṣyā | tiṣṭhanti svādurātayaḥ
Mandala 8 · Verse 15
ṛjrāv indrota ā dade harī ṛkṣasya sūnavi | āśvamedhasya rohitā
Mandala 8 · Verse 16
surathām̐ ātithigve svabhīśūm̐r ārkṣe | āśvamedhe supeśasaḥ
Mandala 8 · Verse 17
ṣaḻ aśvām̐ ātithigva indrote vadhūmataḥ | sacā pūtakratau sanam
Mandala 8 · Verse 18
aiṣu cetad vṛṣaṇvaty antar ṛjreṣv aruṣī | svabhīśuḥ kaśāvatī
Mandala 8 · Verse 19
na yuṣme vājabandhavo ninitsuś cana martyaḥ | avadyam adhi dīdharat
Mandala 8 · Verse 1
pra-pra vas triṣṭubham iṣam mandadvīrāyendave | dhiyā vo medhasātaye puraṁdhyā vivāsati
Mandala 8 · Verse 2
nadaṁ va odatīnāṁ nadaṁ yoyuvatīnām | patiṁ vo aghnyānāṁ dhenūnām iṣudhyasi
Mandala 8 · Verse 3
tā asya sūdadohasaḥ somaṁ śrīṇanti pṛśnayaḥ | janman devānāṁ viśas triṣv ā rocane divaḥ
Mandala 8 · Verse 4
abhi pra gopatiṁ girendram arca yathā vide | sūnuṁ satyasya satpatim
Mandala 8 · Verse 5
ā harayaḥ sasṛjrire 'ruṣīr adhi barhiṣi | yatrābhi saṁnavāmahe
Mandala 8 · Verse 6
indrāya gāva āśiraṁ duduhre vajriṇe madhu | yat sīm upahvare vidat
Mandala 8 · Verse 7
ud yad bradhnasya viṣṭapaṁ gṛham indraś ca ganvahi | madhvaḥ pītvā sacevahi triḥ sapta sakhyuḥ pade
Mandala 8 · Verse 8
arcata prārcata priyamedhāso arcata | arcantu putrakā uta puraṁ na dhṛṣṇv arcata
Mandala 8 · Verse 9
ava svarāti gargaro godhā pari saniṣvaṇat | piṅgā pari caniṣkadad indrāya brahmodyatam
Mandala 8 · Verse 10
ā yat patanty enyaḥ sudughā anapasphuraḥ | apasphuraṁ gṛbhāyata somam indrāya pātave
Mandala 8 · Verse 11
apād indro apād agnir viśve devā amatsata | varuṇa id iha kṣayat tam āpo abhy anūṣata vatsaṁ saṁśiśvarīr iva
Mandala 8 · Verse 12
sudevo asi varuṇa yasya te sapta sindhavaḥ | anukṣaranti kākudaṁ sūrmyaṁ suṣirām iva
Mandala 8 · Verse 13
yo vyatīm̐r aphāṇayat suyuktām̐ upa dāśuṣe | takvo netā tad id vapur upamā yo amucyata
Mandala 8 · Verse 14
atīd u śakra ohata indro viśvā ati dviṣaḥ | bhinat kanīna odanam pacyamānam paro girā
Mandala 8 · Verse 15
arbhako na kumārako 'dhi tiṣṭhan navaṁ ratham | sa pakṣan mahiṣam mṛgam pitre mātre vibhukratum
Mandala 8 · Verse 16
ā tū suśipra dampate rathaṁ tiṣṭhā hiraṇyayam | adha dyukṣaṁ sacevahi sahasrapādam aruṣaṁ svastigām anehasam
Mandala 8 · Verse 17
taṁ ghem itthā namasvina upa svarājam āsate | arthaṁ cid asya sudhitaṁ yad etava āvartayanti dāvane
Mandala 8 · Verse 18
anu pratnasyaukasaḥ priyamedhāsa eṣām | pūrvām anu prayatiṁ vṛktabarhiṣo hitaprayasa āśata
Mandala 8 · Verse 1
yo rājā carṣaṇīnāṁ yātā rathebhir adhriguḥ | viśvāsāṁ tarutā pṛtanānāṁ jyeṣṭho yo vṛtrahā gṛṇe
Mandala 8 · Verse 2
indraṁ taṁ śumbha puruhanmann avase yasya dvitā vidhartari | hastāya vajraḥ prati dhāyi darśato maho dive na sūryaḥ
Mandala 8 · Verse 3
nakiṣ ṭaṁ karmaṇā naśad yaś cakāra sadāvṛdham | indraṁ na yajñair viśvagūrtam ṛbhvasam adhṛṣṭaṁ dhṛṣṇvojasam
Mandala 8 · Verse 4
aṣāḻham ugram pṛtanāsu sāsahiṁ yasmin mahīr urujrayaḥ | saṁ dhenavo jāyamāne anonavur dyāvaḥ kṣāmo anonavuḥ
Mandala 8 · Verse 5
yad dyāva indra te śataṁ śatam bhūmīr uta syuḥ | na tvā vajrin sahasraṁ sūryā anu na jātam aṣṭa rodasī
Mandala 8 · Verse 6
ā paprātha mahinā vṛṣṇyā vṛṣan viśvā śaviṣṭha śavasā | asmām̐ ava maghavan gomati vraje vajriñ citrābhir ūtibhiḥ
Mandala 8 · Verse 7
na sīm adeva āpad iṣaṁ dīrghāyo martyaḥ | etagvā cid ya etaśā yuyojate harī indro yuyojate
Mandala 8 · Verse 8
taṁ vo maho mahāyyam indraṁ dānāya sakṣaṇim | yo gādheṣu ya āraṇeṣu havyo vājeṣv asti havyaḥ
Mandala 8 · Verse 9
ud ū ṣu ṇo vaso mahe mṛśasva śūra rādhase | ud ū ṣu mahyai maghavan maghattaya ud indra śravase mahe
Mandala 8 · Verse 10
tvaṁ na indra ṛtayus tvānido ni tṛmpasi | madhye vasiṣva tuvinṛmṇorvor ni dāsaṁ śiśnatho hathaiḥ
Mandala 8 · Verse 11
anyavratam amānuṣam ayajvānam adevayum | ava svaḥ sakhā dudhuvīta parvataḥ sughnāya dasyum parvataḥ
Mandala 8 · Verse 12
tvaṁ na indrāsāṁ haste śaviṣṭha dāvane | dhānānāṁ na saṁ gṛbhāyāsmayur dviḥ saṁ gṛbhāyāsmayuḥ
Mandala 8 · Verse 13
sakhāyaḥ kratum icchata kathā rādhāma śarasya | upastutim bhojaḥ sūrir yo ahrayaḥ
Mandala 8 · Verse 14
bhūribhiḥ samaha ṛṣibhir barhiṣmadbhiḥ staviṣyase | yad ittham ekam-ekam ic chara vatsān parādadaḥ
Mandala 8 · Verse 15
karṇagṛhyā maghavā śauradevyo vatsaṁ nas tribhya ānayat | ajāṁ sūrir na dhātave
Mandala 8 · Verse 1
tvaṁ no agne mahobhiḥ pāhi viśvasyā arāteḥ | uta dviṣo martyasya
Mandala 8 · Verse 2
nahi manyuḥ pauruṣeya īśe hi vaḥ priyajāta | tvam id asi kṣapāvān
Mandala 8 · Verse 3
sa no viśvebhir devebhir ūrjo napād bhadraśoce | rayiṁ dehi viśvavāram
Mandala 8 · Verse 4
na tam agne arātayo martaṁ yuvanta rāyaḥ | yaṁ trāyase dāśvāṁsam
Mandala 8 · Verse 5
yaṁ tvaṁ vipra medhasātāv agne hinoṣi dhanāya | sa tavotī goṣu gantā
Mandala 8 · Verse 6
tvaṁ rayim puruvīram agne dāśuṣe martāya | pra ṇo naya vasyo accha
Mandala 8 · Verse 7
uruṣyā ṇo mā parā dā aghāyate jātavedaḥ | durādhye3 martāya
Mandala 8 · Verse 8
agne mākiṣ ṭe devasya rātim adevo yuyota | tvam īśiṣe vasūnām
Mandala 8 · Verse 9
sa no vasva upa māsy ūrjo napān māhinasya | sakhe vaso jaritṛbhyaḥ
Mandala 8 · Verse 10
acchā naḥ śīraśociṣaṁ giro yantu darśatam | acchā yajñāso namasā purūvasum purupraśastam ūtaye
Mandala 8 · Verse 11
agniṁ sūnuṁ sahaso jātavedasaṁ dānāya vāryāṇām | dvitā yo bhūd amṛto martyeṣv ā hotā mandratamo viśi
Mandala 8 · Verse 12
agniṁ vo devayajyayāgnim prayaty adhvare | agniṁ dhīṣu prathamam agnim arvaty agniṁ kṣaitrāya sādhase
Mandala 8 · Verse 13
agnir iṣāṁ sakhye dadātu na īśe yo vāryāṇām | agniṁ toke tanaye śaśvad īmahe vasuṁ santaṁ tanūpām
Mandala 8 · Verse 14
agnim īḻiṣvāvase gāthābhiḥ śīraśociṣam | agniṁ rāye purumīḻha śrutaṁ naro 'gniṁ sudītaye chardiḥ
Mandala 8 · Verse 15
agniṁ dveṣo yotavai no gṛṇīmasy agniṁ śaṁ yoś ca dātave | viśvāsu vikṣv aviteva havyo bhuvad vastur ṛṣūṇām
Mandala 8 · Verse 1
haviṣ kṛṇudhvam ā gamad adhvaryur vanate punaḥ | vidvām̐ asya praśāsanam
Mandala 8 · Verse 2
ni tigmam abhy a1ṁśuṁ sīdad dhotā manāv adhi | juṣāṇo asya sakhyam
Mandala 8 · Verse 3
antar icchanti taṁ jane rudram paro manīṣayā | gṛbhṇanti jihvayā sasam
Mandala 8 · Verse 4
jāmy atītape dhanur vayodhā aruhad vanam | dṛṣadaṁ jihvayāvadhīt
Mandala 8 · Verse 5
caran vatso ruśann iha nidātāraṁ na vindate | veti stotava ambyam
Mandala 8 · Verse 6
uto nv asya yan mahad aśvāvad yojanam bṛhad | dāmā rathasya dadṛśe
Mandala 8 · Verse 7
duhanti saptaikām upa dvā pañca sṛjataḥ | tīrthe sindhor adhi svare
Mandala 8 · Verse 8
ā daśabhir vivasvata indraḥ kośam acucyavīt | khedayā trivṛtā divaḥ
Mandala 8 · Verse 9
pari tridhātur adhvaraṁ jūrṇir eti navīyasī | madhvā hotāro añjate
Mandala 8 · Verse 10
siñcanti namasāvatam uccācakram parijmānam | nīcīnabāram akṣitam
Mandala 8 · Verse 11
abhyāram id adrayo niṣiktam puṣkare madhu | avatasya visarjane
Mandala 8 · Verse 12
gāva upāvatāvatam mahī yajñasya rapsudā | ubhā karṇā hiraṇyayā
Mandala 8 · Verse 13
ā sute siñcata śriyaṁ rodasyor abhiśriyam | rasā dadhīta vṛṣabham
Mandala 8 · Verse 14
te jānata svam okya1ṁ saṁ vatsāso na mātṛbhiḥ | mitho nasanta jāmibhiḥ
Mandala 8 · Verse 15
upa srakveṣu bapsataḥ kṛṇvate dharuṇaṁ divi | indre agnā namaḥ svaḥ
Mandala 8 · Verse 16
adhukṣat pipyuṣīm iṣam ūrjaṁ saptapadīm ariḥ | sūryasya sapta raśmibhiḥ
Mandala 8 · Verse 17
somasya mitrāvaruṇoditā sūra ā dade | tad āturasya bheṣajam
Mandala 8 · Verse 18
uto nv asya yat padaṁ haryatasya nidhānyam | pari dyāṁ jihvayātanat
Mandala 8 · Verse 1
ud īrāthām ṛtāyate yuñjāthām aśvinā ratham | anti ṣad bhūtu vām avaḥ
Mandala 8 · Verse 2
nimiṣaś cij javīyasā rathenā yātam aśvinā | anti ṣad bhūtu vām avaḥ
Mandala 8 · Verse 3
upa stṛṇītam atraye himena gharmam aśvinā | anti ṣad bhūtu vām avaḥ
Mandala 8 · Verse 4
kuha sthaḥ kuha jagmathuḥ kuha śyeneva petathuḥ | anti ṣad bhūtu vām avaḥ
Mandala 8 · Verse 5
yad adya karhi karhi cic chuśrūyātam imaṁ havam | anti ṣad bhūtu vām avaḥ
Mandala 8 · Verse 6
aśvinā yāmahūtamā nediṣṭhaṁ yāmy āpyam | anti ṣad bhūtu vām avaḥ
Mandala 8 · Verse 7
avantam atraye gṛhaṁ kṛṇutaṁ yuvam aśvinā | anti ṣad bhūtu vām avaḥ
Mandala 8 · Verse 8
varethe agnim ātapo vadate valgv atraye | anti ṣad bhūtu vām avaḥ
Mandala 8 · Verse 9
pra saptavadhrir āśasā dhārām agner aśāyata | anti ṣad bhūtu vām avaḥ
Mandala 8 · Verse 10
ihā gataṁ vṛṣaṇvasū śṛṇutam ma imaṁ havam | anti ṣad bhūtu vām avaḥ
Mandala 8 · Verse 11
kim idaṁ vām purāṇavaj jarator iva śasyate | anti ṣad bhūtu vām avaḥ
Mandala 8 · Verse 12
samānaṁ vāṁ sajātyaṁ samāno bandhur aśvinā | anti ṣad bhūtu vām avaḥ
Mandala 8 · Verse 13
yo vāṁ rajāṁsy aśvinā ratho viyāti rodasī | anti ṣad bhūtu vām avaḥ
Mandala 8 · Verse 14
ā no gavyebhir aśvyaiḥ sahasrair upa gacchatam | anti ṣad bhūtu vām avaḥ
Mandala 8 · Verse 15
mā no gavyebhir aśvyaiḥ sahasrebhir ati khyatam | anti ṣad bhūtu vām avaḥ
Mandala 8 · Verse 16
aruṇapsur uṣā abhūd akar jyotir ṛtāvarī | anti ṣad bhūtu vām avaḥ
Mandala 8 · Verse 17
aśvinā su vicākaśad vṛkṣam paraśumām̐ iva | anti ṣad bhūtu vām avaḥ
Mandala 8 · Verse 18
puraṁ na dhṛṣṇav ā ruja kṛṣṇayā bādhito viśā | anti ṣad bhūtu vām avaḥ
Mandala 8 · Verse 1
viśo-viśo vo atithiṁ vājayantaḥ purupriyam | agniṁ vo duryaṁ vacaḥ stuṣe śūṣasya manmabhiḥ
Mandala 8 · Verse 2
yaṁ janāso haviṣmanto mitraṁ na sarpirāsutim | praśaṁsanti praśastibhiḥ
Mandala 8 · Verse 3
panyāṁsaṁ jātavedasaṁ yo devatāty udyatā | havyāny airayad divi
Mandala 8 · Verse 4
āganma vṛtrahantamaṁ jyeṣṭham agnim ānavam | yasya śrutarvā bṛhann ārkṣo anīka edhate
Mandala 8 · Verse 5
amṛtaṁ jātavedasaṁ tiras tamāṁsi darśatam | ghṛtāhavanam īḍyam
Mandala 8 · Verse 6
sabādho yaṁ janā ime3 'gniṁ havyebhir īḻate | juhvānāso yatasrucaḥ
Mandala 8 · Verse 7
iyaṁ te navyasī matir agne adhāyy asmad ā | mandra sujāta sukrato 'mūra dasmātithe
Mandala 8 · Verse 8
sā te agne śaṁtamā caniṣṭhā bhavatu priyā | tayā vardhasva suṣṭutaḥ
Mandala 8 · Verse 9
sā dyumnair dyumninī bṛhad upopa śravasi śravaḥ | dadhīta vṛtratūrye
Mandala 8 · Verse 10
aśvam id gāṁ rathaprāṁ tveṣam indraṁ na satpatim | yasya śravāṁsi tūrvatha panyam-panyaṁ ca kṛṣṭayaḥ
Mandala 8 · Verse 11
yaṁ tvā gopavano girā caniṣṭhad agne aṅgiraḥ | sa pāvaka śrudhī havam
Mandala 8 · Verse 12
yaṁ tvā janāsa īḻate sabādho vājasātaye | sa bodhi vṛtratūrye
Mandala 8 · Verse 13
ahaṁ huvāna ārkṣe śrutarvaṇi madacyuti | śardhāṁsīva stukāvinām mṛkṣā śīrṣā caturṇām
Mandala 8 · Verse 14
māṁ catvāra āśavaḥ śaviṣṭhasya dravitnavaḥ | surathāso abhi prayo vakṣan vayo na tugryam
Mandala 8 · Verse 15
satyam it tvā mahenadi paruṣṇy ava dediśam | nem āpo aśvadātaraḥ śaviṣṭhād asti martyaḥ
Mandala 8 · Verse 1
yukṣvā hi devahūtamām̐ aśvām̐ agne rathīr iva | ni hotā pūrvyaḥ sadaḥ
Mandala 8 · Verse 2
uta no deva devām̐ acchā voco viduṣṭaraḥ | śrad viśvā vāryā kṛdhi
Mandala 8 · Verse 3
tvaṁ ha yad yaviṣṭhya sahasaḥ sūnav āhuta | ṛtāvā yajñiyo bhuvaḥ
Mandala 8 · Verse 4
ayam agniḥ sahasriṇo vājasya śatinas patiḥ | mūrdhā kavī rayīṇām
Mandala 8 · Verse 5
taṁ nemim ṛbhavo yathā namasva sahūtibhiḥ | nedīyo yajñam aṅgiraḥ
Mandala 8 · Verse 6
tasmai nūnam abhidyave vācā virūpa nityayā | vṛṣṇe codasva suṣṭutim
Mandala 8 · Verse 7
kam u ṣvid asya senayāgner apākacakṣasaḥ | paṇiṁ goṣu starāmahe
Mandala 8 · Verse 8
mā no devānāṁ viśaḥ prasnātīr ivosrāḥ | kṛśaṁ na hāsur aghnyāḥ
Mandala 8 · Verse 9
mā naḥ samasya dūḍhya1ḥ paridveṣaso aṁhatiḥ | ūrmir na nāvam ā vadhīt
Mandala 8 · Verse 10
namas te agna ojase gṛṇanti deva kṛṣṭayaḥ | amair amitram ardaya
Mandala 8 · Verse 11
kuvit su no gaviṣṭaye 'gne saṁveṣiṣo rayim | urukṛd uru ṇas kṛdhi
Mandala 8 · Verse 12
mā no asmin mahādhane parā varg bhārabhṛd yathā | saṁvargaṁ saṁ rayiṁ jaya
Mandala 8 · Verse 13
anyam asmad bhiyā iyam agne siṣaktu ducchunā | vardhā no amavac chavaḥ
Mandala 8 · Verse 14
yasyājuṣan namasvinaḥ śamīm adurmakhasya vā | taṁ ghed agnir vṛdhāvati
Mandala 8 · Verse 15
parasyā adhi saṁvato 'varām̐ abhy ā tara | yatrāham asmi tām̐ ava
Mandala 8 · Verse 16
vidmā hi te purā vayam agne pitur yathāvasaḥ | adhā te sumnam īmahe
Mandala 8 · Verse 1
imaṁ nu māyinaṁ huva indram īśānam ojasā | marutvantaṁ na vṛñjase
Mandala 8 · Verse 2
ayam indro marutsakhā vi vṛtrasyābhinac chiraḥ | vajreṇa śataparvaṇā
Mandala 8 · Verse 3
vāvṛdhāno marutsakhendro vi vṛtram airayat | sṛjan samudriyā apaḥ
Mandala 8 · Verse 4
ayaṁ ha yena vā idaṁ svar marutvatā jitam | indreṇa somapītaye
Mandala 8 · Verse 5
marutvantam ṛjīṣiṇam ojasvantaṁ virapśinam | indraṁ gīrbhir havāmahe
Mandala 8 · Verse 6
indram pratnena manmanā marutvantaṁ havāmahe | asya somasya pītaye
Mandala 8 · Verse 7
marutvām̐ indra mīḍhvaḥ pibā somaṁ śatakrato | asmin yajñe puruṣṭuta
Mandala 8 · Verse 8
tubhyed indra marutvate sutāḥ somāso adrivaḥ | hṛdā hūyanta ukthinaḥ
Mandala 8 · Verse 9
pibed indra marutsakhā sutaṁ somaṁ diviṣṭiṣu | vajraṁ śiśāna ojasā
Mandala 8 · Verse 10
uttiṣṭhann ojasā saha pītvī śipre avepayaḥ | somam indra camū sutam
Mandala 8 · Verse 11
anu tvā rodasī ubhe krakṣamāṇam akṛpetām | indra yad dasyuhābhavaḥ
Mandala 8 · Verse 12
vācam aṣṭāpadīm ahaṁ navasraktim ṛtaspṛśam | indrāt pari tanvam mame
Mandala 8 · Verse 1
jajñāno nu śatakratur vi pṛcchad iti mātaram | ka ugrāḥ ke ha śṛṇvire
Mandala 8 · Verse 2
ād īṁ śavasy abravīd aurṇavābham ahīśuvam | te putra santu niṣṭuraḥ
Mandala 8 · Verse 3
sam it tān vṛtrahākhidat khe arām̐ iva khedayā | pravṛddho dasyuhābhavat
Mandala 8 · Verse 4
ekayā pratidhāpibat sākaṁ sarāṁsi triṁśatam | indraḥ somasya kāṇukā
Mandala 8 · Verse 5
abhi gandharvam atṛṇad abudhneṣu rajaḥsv ā | indro brahmabhya id vṛdhe
Mandala 8 · Verse 6
nir āvidhyad giribhya ā dhārayat pakvam odanam | indro bundaṁ svātatam
Mandala 8 · Verse 7
śatabradhna iṣus tava sahasraparṇa eka it | yam indra cakṛṣe yujam
Mandala 8 · Verse 8
tena stotṛbhya ā bhara nṛbhyo nāribhyo attave | sadyo jāta ṛbhuṣṭhira
Mandala 8 · Verse 9
etā cyautnāni te kṛtā varṣiṣṭhāni parīṇasā | hṛdā vīḍv adhārayaḥ
Mandala 8 · Verse 10
viśvet tā viṣṇur ābharad urukramas tveṣitaḥ | śatam mahiṣān kṣīrapākam odanaṁ varāham indra emuṣam
Mandala 8 · Verse 11
tuvikṣaṁ te sukṛtaṁ sūmayaṁ dhanuḥ sādhur bundo hiraṇyayaḥ | ubhā te bāhū raṇyā susaṁskṛta ṛdūpe cid ṛdūvṛdhā
Mandala 8 · Verse 1
puroḻāśaṁ no andhasa indra sahasram ā bhara | śatā ca śūra gonām
Mandala 8 · Verse 2
ā no bhara vyañjanaṁ gām aśvam abhyañjanam | sacā manā hiraṇyayā
Mandala 8 · Verse 3
uta naḥ karṇaśobhanā purūṇi dhṛṣṇav ā bhara | tvaṁ hi śṛṇviṣe vaso
Mandala 8 · Verse 4
nakīṁ vṛdhīka indra te na suṣā na sudā uta | nānyas tvac chūra vāghataḥ
Mandala 8 · Verse 5
nakīm indro nikartave na śakraḥ pariśaktave | viśvaṁ śṛṇoti paśyati
Mandala 8 · Verse 6
sa manyum martyānām adabdho ni cikīṣate | purā nidaś cikīṣate
Mandala 8 · Verse 7
kratva it pūrṇam udaraṁ turasyāsti vidhataḥ | vṛtraghnaḥ somapāvnaḥ
Mandala 8 · Verse 8
tve vasūni saṁgatā viśvā ca soma saubhagā | sudātv aparihvṛtā
Mandala 8 · Verse 9
tvām id yavayur mama kāmo gavyur hiraṇyayuḥ | tvām aśvayur eṣate
Mandala 8 · Verse 10
taved indrāham āśasā haste dātraṁ canā dade | dinasya vā maghavan sambhṛtasya vā pūrdhi yavasya kāśinā
Mandala 8 · Verse 1
ayaṁ kṛtnur agṛbhīto viśvajid udbhid it somaḥ | ṛṣir vipraḥ kāvyena
Mandala 8 · Verse 2
abhy ūrṇoti yan nagnam bhiṣakti viśvaṁ yat turam | prem andhaḥ khyan niḥ śroṇo bhūt
Mandala 8 · Verse 3
tvaṁ soma tanūkṛdbhyo dveṣobhyo 'nyakṛtebhyaḥ | uru yantāsi varūtham
Mandala 8 · Verse 4
tvaṁ cittī tava dakṣair diva ā pṛthivyā ṛjīṣin | yāvīr aghasya cid dveṣaḥ
Mandala 8 · Verse 5
arthino yanti ced arthaṁ gacchān id daduṣo rātim | vavṛjyus tṛṣyataḥ kāmam
Mandala 8 · Verse 6
vidad yat pūrvyaṁ naṣṭam ud īm ṛtāyum īrayat | prem āyus tārīd atīrṇam
Mandala 8 · Verse 7
suśevo no mṛḻayākur adṛptakratur avātaḥ | bhavā naḥ soma śaṁ hṛde
Mandala 8 · Verse 8
mā naḥ soma saṁ vīvijo mā vi bībhiṣathā rājan | mā no hārdi tviṣā vadhīḥ
Mandala 8 · Verse 9
ava yat sve sadhasthe devānāṁ durmatīr īkṣe | rājann apa dviṣaḥ sedha mīḍhvo apa sridhaḥ sedha
Mandala 8 · Verse 1
nahy a1nyam baḻākaram marḍitāraṁ śatakrato | tvaṁ na indra mṛḻaya
Mandala 8 · Verse 2
yo naḥ śaśvat purāvithāmṛdhro vājasātaye | sa tvaṁ na indra mṛḻaya
Mandala 8 · Verse 3
kim aṅga radhracodanaḥ sunvānasyāvited asi | kuvit sv indra ṇaḥ śakaḥ
Mandala 8 · Verse 4
indra pra ṇo ratham ava paścāc cit santam adrivaḥ | purastād enam me kṛdhi
Mandala 8 · Verse 5
hanto nu kim āsase prathamaṁ no rathaṁ kṛdhi | upamaṁ vājayu śravaḥ
Mandala 8 · Verse 6
avā no vājayuṁ rathaṁ sukaraṁ te kim it pari | asmān su jigyuṣas kṛdhi
Mandala 8 · Verse 7
indra dṛhyasva pūr asi bhadrā ta eti niṣkṛtam | iyaṁ dhīr ṛtviyāvatī
Mandala 8 · Verse 8
mā sīm avadya ā bhāg urvī kāṣṭhā hitaṁ dhanam | apāvṛktā aratnayaḥ
Mandala 8 · Verse 9
turīyaṁ nāma yajñiyaṁ yadā karas tad uśmasi | ād it patir na ohase
Mandala 8 · Verse 10
avīvṛdhad vo amṛtā amandīd ekadyūr devā uta yāś ca devīḥ | tasmā u rādhaḥ kṛṇuta praśastam prātar makṣū dhiyāvasur jagamyāt
Mandala 8 · Verse 1
ā tū na indra kṣumantaṁ citraṁ grābhaṁ saṁ gṛbhāya | mahāhastī dakṣiṇena
Mandala 8 · Verse 2
vidmā hi tvā tuvikūrmiṁ tuvideṣṇaṁ tuvīmagham | tuvimātram avobhiḥ
Mandala 8 · Verse 3
nahi tvā śūra devā na martāso ditsantam | bhīmaṁ na gāṁ vārayante
Mandala 8 · Verse 4
eto nv indraṁ stavāmeśānaṁ vasvaḥ svarājam | na rādhasā mardhiṣan naḥ
Mandala 8 · Verse 5
pra stoṣad upa gāsiṣac chravat sāma gīyamānam | abhi rādhasā jugurat
Mandala 8 · Verse 6
ā no bhara dakṣiṇenābhi savyena pra mṛśa | indra mā no vasor nir bhāk
Mandala 8 · Verse 7
upa kramasvā bhara dhṛṣatā dhṛṣṇo janānām | adāśūṣṭarasya vedaḥ
Mandala 8 · Verse 8
indra ya u nu te asti vājo viprebhiḥ sanitvaḥ | asmābhiḥ su taṁ sanuhi
Mandala 8 · Verse 9
sadyojuvas te vājā asmabhyaṁ viśvaścandrāḥ | vaśaiś ca makṣū jarante
Mandala 8 · Verse 1
ā pra drava parāvato 'rvāvataś ca vṛtrahan | madhvaḥ prati prabharmaṇi
Mandala 8 · Verse 2
tīvrāḥ somāsa ā gahi sutāso mādayiṣṇavaḥ | pibā dadhṛg yathociṣe
Mandala 8 · Verse 3
iṣā mandasvād u te 'raṁ varāya manyave | bhuvat ta indra śaṁ hṛde
Mandala 8 · Verse 4
ā tv aśatrav ā gahi ny u1kthāni ca hūyase | upame rocane divaḥ
Mandala 8 · Verse 5
tubhyāyam adribhiḥ suto gobhiḥ śrīto madāya kam | pra soma indra hūyate
Mandala 8 · Verse 6
indra śrudhi su me havam asme sutasya gomataḥ | vi pītiṁ tṛptim aśnuhi
Mandala 8 · Verse 7
ya indra camaseṣv ā somaś camūṣu te sutaḥ | pibed asya tvam īśiṣe
Mandala 8 · Verse 8
yo apsu candramā iva somaś camūṣu dadṛśe | pibed asya tvam īśiṣe
Mandala 8 · Verse 9
yaṁ te śyenaḥ padābharat tiro rajāṁsy aspṛtam | pibed asya tvam īśiṣe
Mandala 8 · Verse 1
devānām id avo mahat tad ā vṛṇīmahe vayam | vṛṣṇām asmabhyam ūtaye
Mandala 8 · Verse 2
te naḥ santu yujaḥ sadā varuṇo mitro aryamā | vṛdhāsaś ca pracetasaḥ
Mandala 8 · Verse 3
ati no viṣpitā puru naubhir apo na parṣatha | yūyam ṛtasya rathyaḥ
Mandala 8 · Verse 4
vāmaṁ no astv aryaman vāmaṁ varuṇa śaṁsyam | vāmaṁ hy āvṛṇīmahe
Mandala 8 · Verse 5
vāmasya hi pracetasa īśānāśo riśādasaḥ | nem ādityā aghasya yat
Mandala 8 · Verse 6
vayam id vaḥ sudānavaḥ kṣiyanto yānto adhvann ā | devā vṛdhāya hūmahe
Mandala 8 · Verse 7
adhi na indraiṣāṁ viṣṇo sajātyānām | itā maruto aśvinā
Mandala 8 · Verse 8
pra bhrātṛtvaṁ sudānavo 'dha dvitā samānyā | mātur garbhe bharāmahe
Mandala 8 · Verse 9
yūyaṁ hi ṣṭhā sudānava indrajyeṣṭhā abhidyavaḥ | adhā cid va uta bruve
Mandala 8 · Verse 1
preṣṭhaṁ vo atithiṁ stuṣe mitram iva priyam | agniṁ rathaṁ na vedyam
Mandala 8 · Verse 2
kavim iva pracetasaṁ yaṁ devāso adha dvitā | ni martyeṣv ādadhuḥ
Mandala 8 · Verse 3
tvaṁ yaviṣṭha dāśuṣo nṝm̐ḥ pāhi śṛṇudhī giraḥ | rakṣā tokam uta tmanā
Mandala 8 · Verse 4
kayā te agne aṅgira ūrjo napād upastutim | varāya deva manyave
Mandala 8 · Verse 5
dāśema kasya manasā yajñasya sahaso yaho | kad u voca idaṁ namaḥ
Mandala 8 · Verse 6
adhā tvaṁ hi nas karo viśvā asmabhyaṁ sukṣitīḥ | vājadraviṇaso giraḥ
Mandala 8 · Verse 7
kasya nūnam parīṇaso dhiyo jinvasi dampate | goṣātā yasya te giraḥ
Mandala 8 · Verse 8
tam marjayanta sukratum puroyāvānam ājiṣu | sveṣu kṣayeṣu vājinam
Mandala 8 · Verse 9
kṣeti kṣemebhiḥ sādhubhir nakir yaṁ ghnanti hanti yaḥ | agne suvīra edhate
Mandala 8 · Verse 1
ā me havaṁ nāsatyāśvinā gacchataṁ yuvam | madhvaḥ somasya pītaye
Mandala 8 · Verse 2
imam me stomam aśvinemam me śṛṇutaṁ havam | madhvaḥ somasya pītaye
Mandala 8 · Verse 3
ayaṁ vāṁ kṛṣṇo aśvinā havate vājinīvasū | madhvaḥ somasya pītaye
Mandala 8 · Verse 4
śṛṇutaṁ jaritur havaṁ kṛṣṇasya stuvato narā | madhvaḥ somasya pītaye
Mandala 8 · Verse 5
chardir yantam adābhyaṁ viprāya stuvate narā | madhvaḥ somasya pītaye
Mandala 8 · Verse 6
gacchataṁ dāśuṣo gṛham itthā stuvato aśvinā | madhvaḥ somasya pītaye
Mandala 8 · Verse 7
yuñjāthāṁ rāsabhaṁ rathe vīḍvaṅge vṛṣaṇvasū | madhvaḥ somasya pītaye
Mandala 8 · Verse 8
trivandhureṇa trivṛtā rathenā yātam aśvinā | madhvaḥ somasya pītaye
Mandala 8 · Verse 9
nū me giro nāsatyāśvinā prāvataṁ yuvam | madhvaḥ somasya pītaye
Mandala 8 · Verse 1
ubhā hi dasrā bhiṣajā mayobhuvobhā dakṣasya vacaso babhūvathuḥ | tā vāṁ viśvako havate tanūkṛthe mā no vi yauṣṭaṁ sakhyā mumocatam
Mandala 8 · Verse 2
kathā nūnaṁ vāṁ vimanā upa stavad yuvaṁ dhiyaṁ dadathur vasyaïṣṭaye | tā vāṁ viśvako havate tanūkṛthe mā no vi yauṣṭaṁ sakhyā mumocatam
Mandala 8 · Verse 3
yuvaṁ hi ṣmā purubhujemam edhatuṁ viṣṇāpve dadathur vasyaïṣṭaye | tā vāṁ viśvako havate tanūkṛthe mā no vi yauṣṭaṁ sakhyā mumocatam
Mandala 8 · Verse 4
uta tyaṁ vīraṁ dhanasām ṛjīṣiṇaṁ dūre cit santam avase havāmahe | yasya svādiṣṭhā sumatiḥ pitur yathā mā no vi yauṣṭaṁ sakhyā mumocatam
Mandala 8 · Verse 5
ṛtena devaḥ savitā śamāyata ṛtasya śṛṅgam urviyā vi paprathe | ṛtaṁ sāsāha mahi cit pṛtanyato mā no vi yauṣṭaṁ sakhyā mumocatam
Mandala 8 · Verse 1
dyumnī vāṁ stomo aśvinā krivir na seka ā gatam | madhvaḥ sutasya sa divi priyo narā pātaṁ gaurāv iveriṇe
Mandala 8 · Verse 2
pibataṁ gharmam madhumantam aśvinā barhiḥ sīdataṁ narā | tā mandasānā manuṣo duroṇa ā ni pātaṁ vedasā vayaḥ
Mandala 8 · Verse 3
ā vāṁ viśvābhir ūtibhiḥ priyamedhā ahūṣata | tā vartir yātam upa vṛktabarhiṣo juṣṭaṁ yajñaṁ diviṣṭiṣu
Mandala 8 · Verse 4
pibataṁ somam madhumantam aśvinā barhiḥ sīdataṁ sumat | tā vāvṛdhānā upa suṣṭutiṁ divo gantaṁ gaurāv iveriṇam
Mandala 8 · Verse 5
ā nūnaṁ yātam aśvināśvebhiḥ pruṣitapsubhiḥ | dasrā hiraṇyavartanī śubhas patī pātaṁ somam ṛtāvṛdhā
Mandala 8 · Verse 6
vayaṁ hi vāṁ havāmahe vipanyavo viprāso vājasātaye | tā valgū dasrā purudaṁsasā dhiyāśvinā śruṣṭy ā gatam
Mandala 8 · Verse 1
taṁ vo dasmam ṛtīṣahaṁ vasor mandānam andhasaḥ | abhi vatsaṁ na svasareṣu dhenava indraṁ gīrbhir navāmahe
Mandala 8 · Verse 2
dyukṣaṁ sudānuṁ taviṣībhir āvṛtaṁ giriṁ na purubhojasam | kṣumantaṁ vājaṁ śatinaṁ sahasriṇam makṣū gomantam īmahe
Mandala 8 · Verse 3
na tvā bṛhanto adrayo varanta indra vīḻavaḥ | yad ditsasi stuvate māvate vasu nakiṣ ṭad ā mināti te
Mandala 8 · Verse 4
yoddhāsi kratvā śavasota daṁsanā viśvā jātābhi majmanā | ā tvāyam arka ūtaye vavartati yaṁ gotamā ajījanan
Mandala 8 · Verse 5
pra hi ririkṣa ojasā divo antebhyas pari | na tvā vivyāca raja indra pārthivam anu svadhāṁ vavakṣitha
Mandala 8 · Verse 6
nakiḥ pariṣṭir maghavan maghasya te yad dāśuṣe daśasyasi | asmākam bodhy ucathasya coditā maṁhiṣṭho vājasātaye
Mandala 8 · Verse 1
bṛhad indrāya gāyata maruto vṛtrahaṁtamam | yena jyotir ajanayann ṛtāvṛdho devaṁ devāya jāgṛvi
Mandala 8 · Verse 2
apādhamad abhiśastīr aśastihāthendro dyumny ābhavat | devās ta indra sakhyāya yemire bṛhadbhāno marudgaṇa
Mandala 8 · Verse 3
pra va indrāya bṛhate maruto brahmārcata | vṛtraṁ hanati vṛtrahā śatakratur vajreṇa śataparvaṇā
Mandala 8 · Verse 4
abhi pra bhara dhṛṣatā dhṛṣanmanaḥ śravaś cit te asad bṛhat | arṣantv āpo javasā vi mātaro hano vṛtraṁ jayā svaḥ
Mandala 8 · Verse 5
yaj jāyathā apūrvya maghavan vṛtrahatyāya | tat pṛthivīm aprathayas tad astabhnā uta dyām
Mandala 8 · Verse 6
tat te yajño ajāyata tad arka uta haskṛtiḥ | tad viśvam abhibhūr asi yaj jātaṁ yac ca jantvam
Mandala 8 · Verse 7
āmāsu pakvam airaya ā sūryaṁ rohayo divi | gharmaṁ na sāman tapatā suvṛktibhir juṣṭaṁ girvaṇase bṛhat
Mandala 8 · Verse 1
ā no viśvāsu havya indraḥ samatsu bhūṣatu | upa brahmāṇi savanāni vṛtrahā paramajyā ṛcīṣamaḥ
Mandala 8 · Verse 2
tvaṁ dātā prathamo rādhasām asy asi satya īśānakṛt | tuvidyumnasya yujyā vṛṇīmahe putrasya śavaso mahaḥ
Mandala 8 · Verse 3
brahmā ta indra girvaṇaḥ kriyante anatidbhutā | imā juṣasva haryaśva yojanendra yā te amanmahi
Mandala 8 · Verse 4
tvaṁ hi satyo maghavann anānato vṛtrā bhūri nyṛñjase | sa tvaṁ śaviṣṭha vajrahasta dāśuṣe 'rvāñcaṁ rayim ā kṛdhi
Mandala 8 · Verse 5
tvam indra yaśā asy ṛjīṣī śavasas pate | tvaṁ vṛtrāṇi haṁsy apratīny eka id anuttā carṣaṇīdhṛtā
Mandala 8 · Verse 6
tam u tvā nūnam asura pracetasaṁ rādho bhāgam ivemahe | mahīva kṛttiḥ śaraṇā ta indra pra te sumnā no aśnavan
Mandala 8 · Verse 1
kanyā3 vār avāyatī somam api srutāvidat | astam bharanty abravīd indrāya sunavai tvā śakrāya sunavai tvā
Mandala 8 · Verse 2
asau ya eṣi vīrako gṛhaṁ-gṛhaṁ vicākaśad | imaṁ jambhasutam piba dhānāvantaṁ karambhiṇam apūpavantam ukthinam
Mandala 8 · Verse 3
ā cana tvā cikitsāmo 'dhi cana tvā nemasi | śanair iva śanakair ivendrāyendo pari srava
Mandala 8 · Verse 4
kuvic chakat kuvit karat kuvin no vasyasas karat | kuvit patidviṣo yatīr indreṇa saṁgamāmahai
Mandala 8 · Verse 5
imāni trīṇi viṣṭapā tānīndra vi rohaya | śiras tatasyorvarām ād idam ma upodare
Mandala 8 · Verse 6
asau ca yā na urvarād imāṁ tanva1m mama | atho tatasya yac chiraḥ sarvā tā romaśā kṛdhi
Mandala 8 · Verse 7
khe rathasya khe 'nasaḥ khe yugasya śatakrato | apālām indra triṣ pūtvy akṛṇoḥ sūryatvacam
Mandala 8 · Verse 1
pāntam ā vo andhasa indram abhi pra gāyata | viśvāsāhaṁ śatakratum maṁhiṣṭhaṁ carṣaṇīnām
Mandala 8 · Verse 2
puruhūtam puruṣṭutaṁ gāthānya1ṁ sanaśrutam | indra iti bravītana
Mandala 8 · Verse 3
indra in no mahānāṁ dātā vājānāṁ nṛtuḥ | mahām̐ abhijñv ā yamat
Mandala 8 · Verse 4
apād u śipry andhasaḥ sudakṣasya prahoṣiṇaḥ | indor indro yavāśiraḥ
Mandala 8 · Verse 5
tam v abhi prārcatendraṁ somasya pītaye | tad id dhy asya vardhanam
Mandala 8 · Verse 6
asya pītvā madānāṁ devo devasyaujasā | viśvābhi bhuvanā bhuvat
Mandala 8 · Verse 7
tyam u vaḥ satrāsāhaṁ viśvāsu gīrṣv āyatam | ā cyāvayasy ūtaye
Mandala 8 · Verse 8
yudhmaṁ santam anarvāṇaṁ somapām anapacyutam | naram avāryakratum
Mandala 8 · Verse 9
śikṣā ṇa indra rāya ā puru vidvām̐ ṛcīṣama | avā naḥ pārye dhane
Mandala 8 · Verse 10
ataś cid indra ṇa upā yāhi śatavājayā | iṣā sahasravājayā
Mandala 8 · Verse 11
ayāma dhīvato dhiyo 'rvadbhiḥ śakra godare | jayema pṛtsu vajrivaḥ
Mandala 8 · Verse 12
vayam u tvā śatakrato gāvo na yavaseṣv ā | uktheṣu raṇayāmasi
Mandala 8 · Verse 13
viśvā hi martyatvanānukāmā śatakrato | aganma vajrinn āśasaḥ
Mandala 8 · Verse 14
tve su putra śavaso 'vṛtran kāmakātayaḥ | na tvām indrāti ricyate
Mandala 8 · Verse 15
sa no vṛṣan saniṣṭhayā saṁ ghorayā dravitnvā | dhiyāviḍḍhi puraṁdhyā
Mandala 8 · Verse 16
yas te nūnaṁ śatakratav indra dyumnitamo madaḥ | tena nūnam made madeḥ
Mandala 8 · Verse 17
yas te citraśravastamo ya indra vṛtrahantamaḥ | ya ojodātamo madaḥ
Mandala 8 · Verse 18
vidmā hi yas te adrivas tvādattaḥ satya somapāḥ | viśvāsu dasma kṛṣṭiṣu
Mandala 8 · Verse 19
indrāya madvane sutam pari ṣṭobhantu no giraḥ | arkam arcantu kāravaḥ
Mandala 8 · Verse 20
yasmin viśvā adhi śriyo raṇanti sapta saṁsadaḥ | indraṁ sute havāmahe
Mandala 8 · Verse 21
trikadrukeṣu cetanaṁ devāso yajñam atnata | tam id vardhantu no giraḥ
Mandala 8 · Verse 22
ā tvā viśantv indavaḥ samudram iva sindhavaḥ | na tvām indrāti ricyate
Mandala 8 · Verse 23
vivyaktha mahinā vṛṣan bhakṣaṁ somasya jāgṛve | ya indra jaṭhareṣu te
Mandala 8 · Verse 24
araṁ ta indra kukṣaye somo bhavatu vṛtrahan | araṁ dhāmabhya indavaḥ
Mandala 8 · Verse 25
aram aśvāya gāyati śrutakakṣo araṁ gave | aram indrasya dhāmne
Mandala 8 · Verse 26
araṁ hi ṣma suteṣu ṇaḥ someṣv indra bhūṣasi | araṁ te śakra dāvane
Mandala 8 · Verse 27
parākāttāc cid adrivas tvāṁ nakṣanta no giraḥ | araṁ gamāma te vayam
Mandala 8 · Verse 28
evā hy asi vīrayur evā śūra uta sthiraḥ | evā te rādhyam manaḥ
Mandala 8 · Verse 29
evā rātis tuvīmagha viśvebhir dhāyi dhātṛbhiḥ | adhā cid indra me sacā
Mandala 8 · Verse 30
mo ṣu brahmeva tandrayur bhuvo vājānām pate | matsvā sutasya gomataḥ
Mandala 8 · Verse 31
mā na indrābhy ā3diśaḥ sūro aktuṣv ā yaman | tvā yujā vanema tat
Mandala 8 · Verse 32
tvayed indra yujā vayam prati bruvīmahi spṛdhaḥ | tvam asmākaṁ tava smasi
Mandala 8 · Verse 33
tvām id dhi tvāyavo 'nunonuvataś carān | sakhāya indra kāravaḥ
Mandala 8 · Verse 1
ud ghed abhi śrutāmaghaṁ vṛṣabhaṁ naryāpasam | astāram eṣi sūrya
Mandala 8 · Verse 2
nava yo navatim puro bibheda bāhvojasā | ahiṁ ca vṛtrahāvadhīt
Mandala 8 · Verse 3
sa na indraḥ śivaḥ sakhāśvāvad gomad yavamat | urudhāreva dohate
Mandala 8 · Verse 4
yad adya kac ca vṛtrahann udagā abhi sūrya | sarvaṁ tad indra te vaśe
Mandala 8 · Verse 5
yad vā pravṛddha satpate na marā iti manyase | uto tat satyam it tava
Mandala 8 · Verse 6
ye somāsaḥ parāvati ye arvāvati sunvire | sarvām̐s tām̐ indra gacchasi
Mandala 8 · Verse 7
tam indraṁ vājayāmasi mahe vṛtrāya hantave | sa vṛṣā vṛṣabho bhuvat
Mandala 8 · Verse 8
indraḥ sa dāmane kṛta ojiṣṭhaḥ sa made hitaḥ | dyumnī ślokī sa somyaḥ
Mandala 8 · Verse 9
girā vajro na sambhṛtaḥ sabalo anapacyutaḥ | vavakṣa ṛṣvo astṛtaḥ
Mandala 8 · Verse 10
durge cin naḥ sugaṁ kṛdhi gṛṇāna indra girvaṇaḥ | tvaṁ ca maghavan vaśaḥ
Mandala 8 · Verse 11
yasya te nū cid ādiśaṁ na minanti svarājyam | na devo nādhrigur janaḥ
Mandala 8 · Verse 12
adhā te apratiṣkutaṁ devī śuṣmaṁ saparyataḥ | ubhe suśipra rodasī
Mandala 8 · Verse 13
tvam etad adhārayaḥ kṛṣṇāsu rohiṇīṣu ca | paruṣṇīṣu ruśat payaḥ
Mandala 8 · Verse 14
vi yad aher adha tviṣo viśve devāso akramuḥ | vidan mṛgasya tām̐ amaḥ
Mandala 8 · Verse 15
ād u me nivaro bhuvad vṛtrahādiṣṭa pauṁsyam | ajātaśatrur astṛtaḥ
Mandala 8 · Verse 16
śrutaṁ vo vṛtrahantamam pra śardhaṁ carṣaṇīnām | ā śuṣe rādhase mahe
Mandala 8 · Verse 17
ayā dhiyā ca gavyayā puruṇāman puruṣṭuta | yat some-soma ābhavaḥ
Mandala 8 · Verse 18
bodhinmanā id astu no vṛtrahā bhūryāsutiḥ | śṛṇotu śakra āśiṣam
Mandala 8 · Verse 19
kayā tvaṁ na ūtyābhi pra mandase vṛṣan | kayā stotṛbhya ā bhara
Mandala 8 · Verse 20
kasya vṛṣā sute sacā niyutvān vṛṣabho raṇat | vṛtrahā somapītaye
Mandala 8 · Verse 21
abhī ṣu ṇas tvaṁ rayim mandasānaḥ sahasriṇam | prayantā bodhi dāśuṣe
Mandala 8 · Verse 22
patnīvantaḥ sutā ima uśanto yanti vītaye | apāṁ jagmir nicumpuṇaḥ
Mandala 8 · Verse 23
iṣṭā hotrā asṛkṣatendraṁ vṛdhāso adhvare | acchāvabhṛtham ojasā
Mandala 8 · Verse 24
iha tyā sadhamādyā harī hiraṇyakeśyā | voḻhām abhi prayo hitam
Mandala 8 · Verse 25
tubhyaṁ somāḥ sutā ime stīrṇam barhir vibhāvaso | stotṛbhya indram ā vaha
Mandala 8 · Verse 26
ā te dakṣaṁ vi rocanā dadhad ratnā vi dāśuṣe | stotṛbhya indram arcata
Mandala 8 · Verse 27
ā te dadhāmīndriyam ukthā viśvā śatakrato | stotṛbhya indra mṛḻaya
Mandala 8 · Verse 28
bhadram-bhadraṁ na ā bhareṣam ūrjaṁ śatakrato | yad indra mṛḻayāsi naḥ
Mandala 8 · Verse 29
sa no viśvāny ā bhara suvitāni śatakrato | yad indra mṛḻayāsi naḥ
Mandala 8 · Verse 30
tvām id vṛtrahantama sutāvanto havāmahe | yad indra mṛḻayāsi naḥ
Mandala 8 · Verse 31
upa no haribhiḥ sutaṁ yāhi madānām pate | upa no haribhiḥ sutam
Mandala 8 · Verse 32
dvitā yo vṛtrahantamo vida indraḥ śatakratuḥ | upa no haribhiḥ sutam
Mandala 8 · Verse 33
tvaṁ hi vṛtrahann eṣām pātā somānām asi | upa no haribhiḥ sutam
Mandala 8 · Verse 34
indra iṣe dadātu na ṛbhukṣaṇam ṛbhuṁ rayim | vājī dadātu vājinam
Mandala 8 · Verse 1
gaur dhayati marutāṁ śravasyur mātā maghonām | yuktā vahnī rathānām
Mandala 8 · Verse 2
yasyā devā upasthe vratā viśve dhārayante | sūryāmāsā dṛśe kam
Mandala 8 · Verse 3
tat su no viśve arya ā sadā gṛṇanti kāravaḥ | marutaḥ somapītaye
Mandala 8 · Verse 4
asti somo ayaṁ sutaḥ pibanty asya marutaḥ | uta svarājo aśvinā
Mandala 8 · Verse 5
pibanti mitro aryamā tanā pūtasya varuṇaḥ | triṣadhasthasya jāvataḥ
Mandala 8 · Verse 6
uto nv asya joṣam ām̐ indraḥ sutasya gomataḥ | prātar hoteva matsati
Mandala 8 · Verse 7
kad atviṣanta sūrayas tira āpa iva sridhaḥ | arṣanti pūtadakṣasaḥ
Mandala 8 · Verse 8
kad vo adya mahānāṁ devānām avo vṛṇe | tmanā ca dasmavarcasām
Mandala 8 · Verse 9
ā ye viśvā pārthivāni paprathan rocanā divaḥ | marutaḥ somapītaye
Mandala 8 · Verse 10
tyān nu pūtadakṣaso divo vo maruto huve | asya somasya pītaye
Mandala 8 · Verse 11
tyān nu ye vi rodasī tastabhur maruto huve | asya somasya pītaye
Mandala 8 · Verse 12
tyaṁ nu mārutaṁ gaṇaṁ giriṣṭhāṁ vṛṣaṇaṁ huve | asya somasya pītaye
Mandala 8 · Verse 1
ā tvā giro rathīr ivāsthuḥ suteṣu girvaṇaḥ | abhi tvā sam anūṣatendra vatsaṁ na mātaraḥ
Mandala 8 · Verse 2
ā tvā śukrā acucyavuḥ sutāsa indra girvaṇaḥ | pibā tv a1syāndhasa indra viśvāsu te hitam
Mandala 8 · Verse 3
pibā somam madāya kam indra śyenābhṛtaṁ sutam | tvaṁ hi śaśvatīnām patī rājā viśām asi
Mandala 8 · Verse 4
śrudhī havaṁ tiraścyā indra yas tvā saparyati | suvīryasya gomato rāyas pūrdhi mahām̐ asi
Mandala 8 · Verse 5
indra yas te navīyasīṁ giram mandrām ajījanat | cikitvinmanasaṁ dhiyam pratnām ṛtasya pipyuṣīm
Mandala 8 · Verse 6
tam u ṣṭavāma yaṁ gira indram ukthāni vāvṛdhuḥ | purūṇy asya pauṁsyā siṣāsanto vanāmahe
Mandala 8 · Verse 7
eto nv indraṁ stavāma śuddhaṁ śuddhena sāmnā | śuddhair ukthair vāvṛdhvāṁsaṁ śuddha āśīrvān mamattu
Mandala 8 · Verse 8
indra śuddho na ā gahi śuddhaḥ śuddhābhir ūtibhiḥ | śuddho rayiṁ ni dhāraya śuddho mamaddhi somyaḥ
Mandala 8 · Verse 9
indra śuddho hi no rayiṁ śuddho ratnāni dāśuṣe | śuddho vṛtrāṇi jighnase śuddho vājaṁ siṣāsasi
Mandala 8 · Verse 1
asmā uṣāsa ātiranta yāmam indrāya naktam ūrmyāḥ suvācaḥ | asmā āpo mātaraḥ sapta tasthur nṛbhyas tarāya sindhavaḥ supārāḥ
Mandala 8 · Verse 2
atividdhā vithureṇā cid astrā triḥ sapta sānu saṁhitā girīṇām | na tad devo na martyas tuturyād yāni pravṛddho vṛṣabhaś cakāra
Mandala 8 · Verse 3
indrasya vajra āyaso nimiśla indrasya bāhvor bhūyiṣṭham ojaḥ | śīrṣann indrasya kratavo nireka āsann eṣanta śrutyā upāke
Mandala 8 · Verse 4
manye tvā yajñiyaṁ yajñiyānām manye tvā cyavanam acyutānām | manye tvā satvanām indra ketum manye tvā vṛṣabhaṁ carṣaṇīnām
Mandala 8 · Verse 5
ā yad vajram bāhvor indra dhatse madacyutam ahaye hantavā u | pra parvatā anavanta pra gāvaḥ pra brahmāṇo abhinakṣanta indram
Mandala 8 · Verse 6
tam u ṣṭavāma ya imā jajāna viśvā jātāny avarāṇy asmāt | indreṇa mitraṁ didhiṣema gīrbhir upo namobhir vṛṣabhaṁ viśema
Mandala 8 · Verse 7
vṛtrasya tvā śvasathād īṣamāṇā viśve devā ajahur ye sakhāyaḥ | marudbhir indra sakhyaṁ te astv athemā viśvāḥ pṛtanā jayāsi
Mandala 8 · Verse 8
triḥ ṣaṣṭis tvā maruto vāvṛdhānā usrā iva rāśayo yajñiyāsaḥ | upa tvemaḥ kṛdhi no bhāgadheyaṁ śuṣmaṁ ta enā haviṣā vidhema
Mandala 8 · Verse 9
tigmam āyudham marutām anīkaṁ kas ta indra prati vajraṁ dadharṣa | anāyudhāso asurā adevāś cakreṇa tām̐ apa vapa ṛjīṣin
Mandala 8 · Verse 10
maha ugrāya tavase suvṛktim preraya śivatamāya paśvaḥ | girvāhase gira indrāya pūrvīr dhehi tanve kuvid aṅga vedat
Mandala 8 · Verse 11
ukthavāhase vibhve manīṣāṁ druṇā na pāram īrayā nadīnām | ni spṛśa dhiyā tanvi śrutasya juṣṭatarasya kuvid aṅga vedat
Mandala 8 · Verse 12
tad viviḍḍhi yat ta indro jujoṣat stuhi suṣṭutiṁ namasā vivāsa | upa bhūṣa jaritar mā ruvaṇyaḥ śrāvayā vācaṁ kuvid aṅga vedat
Mandala 8 · Verse 13
ava drapso aṁśumatīm atiṣṭhad iyānaḥ kṛṣṇo daśabhiḥ sahasraiḥ | āvat tam indraḥ śacyā dhamantam apa snehitīr nṛmaṇā adhatta
Mandala 8 · Verse 14
drapsam apaśyaṁ viṣuṇe carantam upahvare nadyo aṁśumatyāḥ | nabho na kṛṣṇam avatasthivāṁsam iṣyāmi vo vṛṣaṇo yudhyatājau
Mandala 8 · Verse 15
adha drapso aṁśumatyā upasthe 'dhārayat tanvaṁ titviṣāṇaḥ | viśo adevīr abhy ā3carantīr bṛhaspatinā yujendraḥ sasāhe
Mandala 8 · Verse 16
tvaṁ ha tyat saptabhyo jāyamāno 'śatrubhyo abhavaḥ śatrur indra | gūḻhe dyāvāpṛthivī anv avindo vibhumadbhyo bhuvanebhyo raṇaṁ dhāḥ
Mandala 8 · Verse 17
tvaṁ ha tyad apratimānam ojo vajreṇa vajrin dhṛṣito jaghantha | tvaṁ śuṣṇasyāvātiro vadhatrais tvaṁ gā indra śacyed avindaḥ
Mandala 8 · Verse 18
tvaṁ ha tyad vṛṣabha carṣaṇīnāṁ ghano vṛtrāṇāṁ taviṣo babhūtha | tvaṁ sindhūm̐r asṛjas tastabhānān tvam apo ajayo dāsapatnīḥ
Mandala 8 · Verse 19
sa sukratū raṇitā yaḥ suteṣv anuttamanyur yo aheva revān | ya eka in nary apāṁsi kartā sa vṛtrahā pratīd anyam āhuḥ
Mandala 8 · Verse 20
sa vṛtrahendraś carṣaṇīdhṛt taṁ suṣṭutyā havyaṁ huvema | sa prāvitā maghavā no 'dhivaktā sa vājasya śravasyasya dātā
Mandala 8 · Verse 21
sa vṛtrahendra ṛbhukṣāḥ sadyo jajñāno havyo babhūva | kṛṇvann apāṁsi naryā purūṇi somo na pīto havyaḥ sakhibhyaḥ
Mandala 8 · Verse 1
yā indra bhuja ābharaḥ svarvām̐ asurebhyaḥ | stotāram in maghavann asya vardhaya ye ca tve vṛktabarhiṣaḥ
Mandala 8 · Verse 2
yam indra dadhiṣe tvam aśvaṁ gām bhāgam avyayam | yajamāne sunvati dakṣiṇāvati tasmin taṁ dhehi mā paṇau
Mandala 8 · Verse 3
ya indra sasty avrato 'nuṣvāpam adevayuḥ | svaiḥ ṣa evair mumurat poṣyaṁ rayiṁ sanutar dhehi taṁ tataḥ
Mandala 8 · Verse 4
yac chakrāsi parāvati yad arvāvati vṛtrahan | atas tvā gīrbhir dyugad indra keśibhiḥ sutāvām̐ ā vivāsati
Mandala 8 · Verse 5
yad vāsi rocane divaḥ samudrasyādhi viṣṭapi | yat pārthive sadane vṛtrahantama yad antarikṣa ā gahi
Mandala 8 · Verse 6
sa naḥ someṣu somapāḥ suteṣu śavasas pate | mādayasva rādhasā sūnṛtāvatendra rāyā parīṇasā
Mandala 8 · Verse 7
mā na indra parā vṛṇag bhavā naḥ sadhamādyaḥ | tvaṁ na ūtī tvam in na āpyam mā na indra parā vṛṇak
Mandala 8 · Verse 8
asme indra sacā sute ni ṣadā pītaye madhu | kṛdhī jaritre maghavann avo mahad asme indra sacā sute
Mandala 8 · Verse 9
na tvā devāsa āśata na martyāso adrivaḥ | viśvā jātāni śavasābhibhūr asi na tvā devāsa āśata
Mandala 8 · Verse 10
viśvāḥ pṛtanā abhibhūtaraṁ naraṁ sajūs tatakṣur indraṁ jajanuś ca rājase | kratvā variṣṭhaṁ vara āmurim utogram ojiṣṭhaṁ tavasaṁ tarasvinam
Mandala 8 · Verse 11
sam īṁ rebhāso asvarann indraṁ somasya pītaye | svarpatiṁ yad īṁ vṛdhe dhṛtavrato hy ojasā sam ūtibhiḥ
Mandala 8 · Verse 12
nemiṁ namanti cakṣasā meṣaṁ viprā abhisvarā | sudītayo vo adruho 'pi karṇe tarasvinaḥ sam ṛkvabhiḥ
Mandala 8 · Verse 13
tam indraṁ johavīmi maghavānam ugraṁ satrā dadhānam apratiṣkutaṁ śavāṁsi | maṁhiṣṭho gīrbhir ā ca yajñiyo vavartad rāye no viśvā supathā kṛṇotu vajrī
Mandala 8 · Verse 14
tvam pura indra cikid enā vy ojasā śaviṣṭha śakra nāśayadhyai | tvad viśvāni bhuvanāni vajrin dyāvā rejete pṛthivī ca bhīṣā
Mandala 8 · Verse 15
tan ma ṛtam indra śūra citra pātv apo na vajrin duritāti parṣi bhūri | kadā na indra rāya ā daśasyer viśvapsnyasya spṛhayāyyasya rājan
Mandala 8 · Verse 1
indrāya sāma gāyata viprāya bṛhate bṛhat | dharmakṛte vipaścite panasyave
Mandala 8 · Verse 2
tvam indrābhibhūr asi tvaṁ sūryam arocayaḥ | viśvakarmā viśvadevo mahām̐ asi
Mandala 8 · Verse 3
vibhrājañ jyotiṣā sva1r agaccho rocanaṁ divaḥ | devās ta indra sakhyāya yemire
Mandala 8 · Verse 4
endra no gadhi priyaḥ satrājid agohyaḥ | girir na viśvatas pṛthuḥ patir divaḥ
Mandala 8 · Verse 5
abhi hi satya somapā ubhe babhūtha rodasī | indrāsi sunvato vṛdhaḥ patir divaḥ
Mandala 8 · Verse 6
tvaṁ hi śaśvatīnām indra dartā purām asi | hantā dasyor manor vṛdhaḥ patir divaḥ
Mandala 8 · Verse 7
adhā hīndra girvaṇa upa tvā kāmān mahaḥ sasṛjmahe | udeva yanta udabhiḥ
Mandala 8 · Verse 8
vār ṇa tvā yavyābhir vardhanti śūra brahmāṇi | vāvṛdhvāṁsaṁ cid adrivo dive-dive
Mandala 8 · Verse 9
yuñjanti harī iṣirasya gāthayorau ratha uruyuge | indravāhā vacoyujā
Mandala 8 · Verse 10
tvaṁ na indrā bharam̐ ojo nṛmṇaṁ śatakrato vicarṣaṇe | ā vīram pṛtanāṣaham
Mandala 8 · Verse 11
tvaṁ hi naḥ pitā vaso tvam mātā śatakrato babhūvitha | adhā te sumnam īmahe
Mandala 8 · Verse 12
tvāṁ śuṣmin puruhūta vājayantam upa bruve śatakrato | sa no rāsva suvīryam
Mandala 8 · Verse 1
tvām idā hyo naro 'pīpyan vajrin bhūrṇayaḥ | sa indra stomavāhasām iha śrudhy upa svasaram ā gahi
Mandala 8 · Verse 2
matsvā suśipra harivas tad īmahe tve ā bhūṣanti vedhasaḥ | tava śravāṁsy upamāny ukthyā suteṣv indra girvaṇaḥ
Mandala 8 · Verse 3
śrāyanta iva sūryaṁ viśved indrasya bhakṣata | vasūni jāte janamāna ojasā prati bhāgaṁ na dīdhima
Mandala 8 · Verse 4
anarśarātiṁ vasudām upa stuhi bhadrā indrasya rātayaḥ | so asya kāmaṁ vidhato na roṣati mano dānāya codayan
Mandala 8 · Verse 5
tvam indra pratūrtiṣv abhi viśvā asi spṛdhaḥ | aśastihā janitā viśvatūr asi tvaṁ tūrya taruṣyataḥ
Mandala 8 · Verse 6
anu te śuṣmaṁ turayantam īyatuḥ kṣoṇī śiśuṁ na mātarā | viśvās te spṛdhaḥ śnathayanta manyave vṛtraṁ yad indra tūrvasi
Mandala 8 · Verse 7
ita ūtī vo ajaram prahetāram aprahitam | āśuṁ jetāraṁ hetāraṁ rathītamam atūrtaṁ tugryāvṛdham
Mandala 8 · Verse 8
iṣkartāram aniṣkṛtaṁ sahaskṛtaṁ śatamūtiṁ śatakratum | samānam indram avase havāmahe vasavānaṁ vasūjuvam
Mandala 8 · Verse 1
ayaṁ ta emi tanvā purastād viśve devā abhi mā yanti paścāt | yadā mahyaṁ dīdharo bhāgam indrād in mayā kṛṇavo vīryāṇi
Mandala 8 · Verse 2
dadhāmi te madhuno bhakṣam agre hitas te bhāgaḥ suto astu somaḥ | asaś ca tvaṁ dakṣiṇataḥ sakhā me 'dhā vṛtrāṇi jaṅghanāva bhūri
Mandala 8 · Verse 3
pra su stomam bharata vājayanta indrāya satyaṁ yadi satyam asti | nendro astīti nema u tva āha ka īṁ dadarśa kam abhi ṣṭavāma
Mandala 8 · Verse 4
ayam asmi jaritaḥ paśya meha viśvā jātāny abhy asmi mahnā | ṛtasya mā pradiśo vardhayanty ādardiro bhuvanā dardarīmi
Mandala 8 · Verse 5
ā yan mā venā aruhann ṛtasyam̐ ekam āsīnaṁ haryatasya pṛṣṭhe | manaś cin me hṛda ā praty avocad acikradañ chiśumantaḥ sakhāyaḥ
Mandala 8 · Verse 6
viśvet tā te savaneṣu pravācyā yā cakartha maghavann indra sunvate | pārāvataṁ yat purusambhṛtaṁ vasv apāvṛṇoḥ śarabhāya ṛṣibandhave
Mandala 8 · Verse 7
pra nūnaṁ dhāvatā pṛthaṅ neha yo vo avāvarīt | ni ṣīṁ vṛtrasya marmaṇi vajram indro apīpatat
Mandala 8 · Verse 8
manojavā ayamāna āyasīm atarat puram | divaṁ suparṇo gatvāya somaṁ vajriṇa ābharat
Mandala 8 · Verse 9
samudre antaḥ śayata udnā vajro abhīvṛtaḥ | bharanty asmai saṁyataḥ puraḥprasravaṇā balim
Mandala 8 · Verse 10
yad vāg vadanty avicetanāni rāṣṭrī devānāṁ niṣasāda mandrā | catasra ūrjaṁ duduhe payāṁsi kva svid asyāḥ paramaṁ jagāma
Mandala 8 · Verse 11
devīṁ vācam ajanayanta devās tāṁ viśvarūpāḥ paśavo vadanti | sā no mandreṣam ūrjaṁ duhānā dhenur vāg asmān upa suṣṭutaitu
Mandala 8 · Verse 12
sakhe viṣṇo vitaraṁ vi kramasva dyaur dehi lokaṁ vajrāya viṣkabhe | hanāva vṛtraṁ riṇacāva sindhūn indrasya yantu prasave visṛṣṭāḥ
Mandala 8 · Verse 1
ṛdhag itthā sa martyaḥ śaśame devatātaye | yo nūnam mitrāvaruṇāv abhiṣṭaya ācakre havyadātaye
Mandala 8 · Verse 2
varṣiṣṭhakṣatrā urucakṣasā narā rājānā dīrghaśruttamā | tā bāhutā na daṁsanā ratharyataḥ sākaṁ sūryasya raśmibhiḥ
Mandala 8 · Verse 3
pra yo vām mitrāvaruṇājiro dūto adravat | ayaḥśīrṣā maderaghuḥ
Mandala 8 · Verse 4
na yaḥ sampṛcche na punar havītave na saṁvādāya ramate | tasmān no adya samṛter uruṣyatam bāhubhyāṁ na uruṣyatam
Mandala 8 · Verse 5
pra mitrāya prāryamṇe sacathyam ṛtāvaso | varūthya1ṁ varuṇe chandyaṁ vacaḥ stotraṁ rājasu gāyata
Mandala 8 · Verse 6
te hinvire aruṇaṁ jenyaṁ vasv ekam putraṁ tisṝṇām | te dhāmāny amṛtā martyānām adabdhā abhi cakṣate
Mandala 8 · Verse 7
ā me vacāṁsy udyatā dyumattamāni kartvā | ubhā yātaṁ nāsatyā sajoṣasā prati havyāni vītaye
Mandala 8 · Verse 8
rātiṁ yad vām arakṣasaṁ havāmahe yuvābhyāṁ vājinīvasū | prācīṁ hotrām pratirantāv itaṁ narā gṛṇānā jamadagninā
Mandala 8 · Verse 9
ā no yajñaṁ divispṛśaṁ vāyo yāhi sumanmabhiḥ | antaḥ pavitra upari śrīṇāno3 'yaṁ śukro ayāmi te
Mandala 8 · Verse 10
vety adhvaryuḥ pathibhī rajiṣṭhaiḥ prati havyāni vītaye | adhā niyutva ubhayasya naḥ piba śuciṁ somaṁ gavāśiram
Mandala 8 · Verse 11
baṇ mahām̐ asi sūrya baḻ āditya mahām̐ asi | mahas te sato mahimā panasyate 'ddhā deva mahām̐ asi
Mandala 8 · Verse 12
baṭ sūrya śravasā mahām̐ asi satrā deva mahām̐ asi | mahnā devānām asuryaḥ purohito vibhu jyotir adābhyam
Mandala 8 · Verse 13
iyaṁ yā nīcy arkiṇī rūpā rohiṇyā kṛtā | citreva praty adarśy āyaty a1ntar daśasu bāhuṣu
Mandala 8 · Verse 14
prajā ha tisro atyāyam īyur ny a1nyā arkam abhito viviśre | bṛhad dha tasthau bhuvaneṣv antaḥ pavamāno harita ā viveśa
Mandala 8 · Verse 15
mātā rudrāṇāṁ duhitā vasūnāṁ svasādityānām amṛtasya nābhiḥ | pra nu vocaṁ cikituṣe janāya mā gām anāgām aditiṁ vadhiṣṭa
Mandala 8 · Verse 16
vacovidaṁ vācam udīrayantīṁ viśvābhir dhībhir upatiṣṭhamānām | devīṁ devebhyaḥ pary eyuṣīṁ gām ā māvṛkta martyo dabhracetāḥ
Mandala 8 · Verse 1
tvam agne bṛhad vayo dadhāsi deva dāśuṣe | kavir gṛhapatir yuvā
Mandala 8 · Verse 2
sa na īḻānayā saha devām̐ agne duvasyuvā | cikid vibhānav ā vaha
Mandala 8 · Verse 3
tvayā ha svid yujā vayaṁ codiṣṭhena yaviṣṭhya | abhi ṣmo vājasātaye
Mandala 8 · Verse 4
aurvabhṛguvac chucim apnavānavad ā huve | agniṁ samudravāsasam
Mandala 8 · Verse 5
huve vātasvanaṁ kavim parjanyakrandyaṁ sahaḥ | agniṁ samudravāsasam
Mandala 8 · Verse 6
ā savaṁ savitur yathā bhagasyeva bhujiṁ huve | agniṁ samudravāsasam
Mandala 8 · Verse 7
agniṁ vo vṛdhantam adhvarāṇām purūtamam | acchā naptre sahasvate
Mandala 8 · Verse 8
ayaṁ yathā na ābhuvat tvaṣṭā rūpeva takṣyā | asya kratvā yaśasvataḥ
Mandala 8 · Verse 9
ayaṁ viśvā abhi śriyo 'gnir deveṣu patyate | ā vājair upa no gamat
Mandala 8 · Verse 10
viśveṣām iha stuhi hotṝṇāṁ yaśastamam | agniṁ yajñeṣu pūrvyam
Mandala 8 · Verse 11
śīram pāvakaśociṣaṁ jyeṣṭho yo dameṣv ā | dīdāya dīrghaśruttamaḥ
Mandala 8 · Verse 12
tam arvantaṁ na sānasiṁ gṛṇīhi vipra śuṣmiṇam | mitraṁ na yātayajjanam
Mandala 8 · Verse 13
upa tvā jāmayo giro dediśatīr haviṣkṛtaḥ | vāyor anīke asthiran
Mandala 8 · Verse 14
yasya tridhātv avṛtam barhis tasthāv asaṁdinam | āpaś cin ni dadhā padam
Mandala 8 · Verse 15
padaṁ devasya mīḻhuṣo 'nādhṛṣṭābhir ūtibhiḥ | bhadrā sūrya ivopadṛk
Mandala 8 · Verse 16
agne ghṛtasya dhītibhis tepāno deva śociṣā | ā devān vakṣi yakṣi ca
Mandala 8 · Verse 17
taṁ tvājananta mātaraḥ kaviṁ devāso aṅgiraḥ | havyavāham amartyam
Mandala 8 · Verse 18
pracetasaṁ tvā kave 'gne dūtaṁ vareṇyam | havyavāhaṁ ni ṣedire
Mandala 8 · Verse 19
nahi me asty aghnyā na svadhitir vananvati | athaitādṛg bharāmi te
Mandala 8 · Verse 20
yad agne kāni kāni cid ā te dārūṇi dadhmasi | tā juṣasva yaviṣṭhya
Mandala 8 · Verse 21
yad atty upajihvikā yad vamro atisarpati | sarvaṁ tad astu te ghṛtam
Mandala 8 · Verse 22
agnim indhāno manasā dhiyaṁ saceta martyaḥ | agnim īdhe vivasvabhiḥ
Mandala 8 · Verse 1
adarśi gātuvittamo yasmin vratāny ādadhuḥ | upo ṣu jātam āryasya vardhanam agniṁ nakṣanta no giraḥ
Mandala 8 · Verse 2
pra daivodāso agnir devām̐ acchā na majmanā | anu mātaram pṛthivīṁ vi vāvṛte tasthau nākasya sānavi
Mandala 8 · Verse 3
yasmād rejanta kṛṣṭayaś carkṛtyāni kṛṇvataḥ | sahasrasām medhasātāv iva tmanāgniṁ dhībhiḥ saparyata
Mandala 8 · Verse 4
pra yaṁ rāye ninīṣasi marto yas te vaso dāśat | sa vīraṁ dhatte agna ukthaśaṁsinaṁ tmanā sahasrapoṣiṇam
Mandala 8 · Verse 5
sa dṛḻhe cid abhi tṛṇatti vājam arvatā sa dhatte akṣiti śravaḥ | tve devatrā sadā purūvaso viśvā vāmāni dhīmahi
Mandala 8 · Verse 6
yo viśvā dayate vasu hotā mandro janānām | madhor na pātrā prathamāny asmai pra stomā yanty agnaye
Mandala 8 · Verse 7
aśvaṁ na gīrbhī rathyaṁ sudānavo marmṛjyante devayavaḥ | ubhe toke tanaye dasma viśpate parṣi rādho maghonām
Mandala 8 · Verse 8
pra maṁhiṣṭhāya gāyata ṛtāvne bṛhate śukraśociṣe | upastutāso agnaye
Mandala 8 · Verse 9
ā vaṁsate maghavā vīravad yaśaḥ samiddho dyumny āhutaḥ | kuvin no asya sumatir navīyasy acchā vājebhir āgamat
Mandala 8 · Verse 10
preṣṭham u priyāṇāṁ stuhy āsāvātithim | agniṁ rathānāṁ yamam
Mandala 8 · Verse 11
uditā yo niditā veditā vasv ā yajñiyo vavartati | duṣṭarā yasya pravaṇe normayo dhiyā vājaṁ siṣāsataḥ
Mandala 8 · Verse 12
mā no hṛṇītām atithir vasur agniḥ purupraśasta eṣaḥ | yaḥ suhotā svadhvaraḥ
Mandala 8 · Verse 13
mo te riṣan ye acchoktibhir vaso 'gne kebhiś cid evaiḥ | kīriś cid dhi tvām īṭṭe dūtyāya rātahavyaḥ svadhvaraḥ
Mandala 8 · Verse 14
āgne yāhi marutsakhā rudrebhiḥ somapītaye | sobharyā upa suṣṭutim mādayasva svarṇare
--- Previous Pages - Next Page ---
